වම් ඇහිබැමට ඉහළින් !!!

.

වම් ඇහිබැමට ඉහළින් 

තිබුනා කුඩා ඉන්නෙක් 

තරහ ගිය වෙලාවට 

රතු වෙන.

කොතෙක් වෙර දමා පීරුවත් 

කුඩා කෙස් කැරැල්ලක් 

නළලට වැටෙනවාමයි 

හැමවිට.

කොටු කොටු කමිස වලට 

වැඩියෙන්ම කැමතියි 

කළු කලිසම් වලට 

ගැළපෙන. 

මගුල් දවසෙදි වුනත් 

තිබුන්නෑලු හිනාවක් 

කවුරුත් කතාවුනේ 

ඒ ගැන .
අවුරුදු ගානකින්  

ලියුමක්වත් නොඑව්වේ 

පුංචි දූ  හැංගුවද 

ලිපිනය?

ගෙම්බන්ටත් හාදු!!!

.

ගෙම්බෝ ඉන්න තරමට

හාදු..හාදු...හාදු....

කොච්චරක් කියල දෙන්නද?

නිල් පැහැ කැන්වසය !

.

දිය සායම් බඳුන් 

රැගෙන එයි සැන්දෑව 

නිල් පැහැ කැන්වසය මත

හෙලනු පිණිස .

දැඩි දඬුවම්!!!

.

දඬුවම් කල යුතුය 

අරලියා සුවඳැති

විළවුන්

නිපදවූ අයටද 

ගැල්වූ අයටද 

ඉවසූ අයටද

බොහෝ කල් යනතුරු 

සිහි තබාගත් අයටද .

වවුල් ගීයක්!!!

Arvind Kolapkar

.

රන්වන් වතක් යට 

හැඩිදැඩි උරක් මත 

සැතපෙන්න තහනම්ද 

බණ්ඩාරේ අපට.

හෙන ගහන අඳුරක 

වෙණ හඬක් නෑහුනත්

සීපද කියන්න අකැපද 

කියහන් ඉක්මනට.

හඳ හැංගෙනා රෑක 

යටි උගුරින් ඇහෙන 

වවුල් ගීයක් වගෙද 

මගේ පෙම නුඹට .

ගිලගත් සියුම් ඉකියක් !!

.

හෙවණැලි ඇදී 

වක්වී ඉතා දික්වී 

යනයුරු නරඹනවාද 

හෙවනැල්ලද අහිමිවී.

රාත්‍රිය සෙමෙන් පියමැන 

කරගැට පිරිමදී දහවල 

මට හිමි කඳුළු එක්කර 

බහාලනු මැන රිදී බඳුනක.

ඝණ්ටා හඬක් මෙන් 

දුර ඈත පල්ලියක 

ඇසෙනු ඇත ප්‍රතිරාව 

ගිලගත් සියුම් ඉකියක.

දළඹු ස්නේහය!!

Carrie Vielle_

සමනළයෙක් වෙන්න බැරිවුණු 

ස්නේහයක් ඇත අද ද නොමැකුණු

සමහර පාළු සන්ධ්‍යාවන්හිදී 

දළඹු බූටෑව ළයේ තැවරුණු . 

රෝස කම්මුල් සහිත දෙවඟන!!

.

ප්‍රියය ,

මා මිය යන්න පෙර 

ඔබේ උණුසුම් දෙතොලින් 

මගේ කම්මුල් සිප ගන්න.

ඉන්පසු හැකිවෙයි මට 

රෝස කම්මුල් සහිත දෙවඟනයැයි 

නම් ලබන්න.

කොතෙක් දෙවිවරු සිප ගන්න ආවත් 

'බැහැයි'කියා ඔලුව සොලවන්න.

මේ ඒ ශාපයයි !

                                                           

Pavel_Guzenko  

මේ ඒ ශාපයයි !

සැඩ රළ අස 

පිදුරු ගස 

අත්හල

හරියටම අන්න එතැන!

Natalia Bryliova

.

මියුරු හඬකින් ගැයුන 

ඉමිහිරිම ගීයක 

ශෝකී පද පේළියක 

බිඳුණි කටහඬ. 

නතරවිණි වෙණ නද.

හරියටම අන්න එතැන 

පහළවිණි 

ප්‍රේමය.

මා සහ සඳ!

.

මා එක තැනක තියා 

 ඇවිද යයි
සඳ.

පහන් නිමන්නෙකු!

.

පහන් නිවන්නකු පැමිණ 

ලන්තෑරුම් නිවයි 

අහස මත.

ශෝකාකූළ මිනිසුන්!!

.

සුරා බොති 

ශෝකාකූළ මිනිසුන් 

උස් සිනා හඬ නගමින් 

ගිම්හාන අහස යට.

නිරුවත් ඇඳුම්!!

                                                                  Bogdan-Prystrom-___

ඇඳුම් සොයා ගන්න පෙර 

නොතිබුණි 

නිරුවත කියා දෙයක් 

ලොව .

ලුණු රසැති චුම්බන!

                                                                 

දීර්ඝ සෙවනැළි සහිත 

අඳුරු පැහැ සැන්දෑව 

සර සර හඬ නගයි සුළඟ 

වෙහෙසින් ම්ලාන ව 

දුම් ගසන ලිප් අසල 

කිහිළි යට දහදිය පැල්ලම් ඇති ගැහැණු 

හොදි සමග බත් පිසිති 

පිටුපා එළඹෙන රාත්‍රියට.

මත්පැන් සුවඳ සමග 

ඉදිරිපස දොර ඇරෙන හඬ 

නිදි කිරන ළමයින්

කම්මැලි පාඩම් පොත් සමග.

ලුණු රසැති චුම්බනද 

අනුරාග කෙඳිරිලි ද 

නිවෙයි තෙල් මඳ පහනක් 

කර ගඳක් ශේෂ කර. 

හෝරා යතුරක ටිකි ටිකිය 

වළප්නා සඳකි අහසක 

කාගේදැයි නොදත් 

හුදකලා කඳුලකි තණ මත.

ශාප ලද සර්පයා !!

                                                                   Alex Stevenson

ශාප ලද සර්පයා 

ගෙදරවුව සිටිය හැක 

දම්රෝ සෝෆාවේ වාඩිගෙන

කිං සයිස් ඇඳේ ඇලවීගෙන 

කණ්නාඩියෙන් මුහුණ බලමින් 

මඟතොට දුටු ගැහැණු ගැන සිතමින් 

බත ඉදෙනතුරු ගොං විහිලු කරමින් 

ශාප ලද සර්පයා 

ගෙදරවුව සිටිය හැක.

හුවමාරුවකට කැමැත්තෙමි!

Anila Ciccone

.

සිරවී සිටිය යුතුමද 

නීරස කුළගෙයක 

හිමිවුවද අත්තටු 

ඉගිල්ලෙනු තහනම් කළ 

ආසියාතික ගැහැණු සිරුරක 

ගොරහැඩි සළු තුළ වහන්වී 

රහසේම කුඩා පව් කරමින් 

බැඳෙමින් බිඳෙමින් යළිදු බැඳෙමින්.

සිහිල් කළ වයින් බඳුනක 

තිත්ත මුසුකල රසය විඳිමින් 

ඉර හඳ තරු සමග 

නිදහස් රමණයක යෙදෙමින් 

සිහින් දිග කකුල් පෙන්වන 

යුගල නැටුමක යෙදෙමින් 

හුවමාරු කරගත හැකිනම් ජීවිතය

ප්‍රංශ යුවතියක සමගින්.

වසැංගූ දුක!!

.

Josephine Wall.__

අඳුරු පැහැ කඳු මත 

පහන් දල්වන්න පෙර 

කදෝකිමි 

වරක් කියවූ ඔබේ කවිපොත 

නැවත නැවතත් 

හොඳින් කියවමි.

කොමා,ප්‍රශ්ණ ලකුණු,ඉස්පිලි හා ඇලපිලි 

ඝන කළුවරකවුව ඉවෙන් මෙන් හඳුනමි.

නම් ගම්ද මුහුණුද පසුකර පැමිණි 

කලක සිට දන්නවුන් සේ සලකමි.

කුඩා කුරුමිණි අකුරු අතරේ සිරවී 

රහස් බසකින් ලියු කවියක් හසුවේ 

මට වසැංගූ දුකම කඳුලක කැළලේ 

සොඳුර ඔබ මෙන් මා පවා වල්මත්වේ.

සොඳුර ඔබ කවිපොත 

අවසන් වරට කියවමි.

අකාළයේම !!

මඳ දුරක් ඉගිළ ගොස්
හති වැටෙන්නට කලින්
නතරවූ අත්තටුව.

ගං දියේ පාව ගොස්
වැලිතලය බදා ගත්
කොස් කොළය.

බිම වැටෙන්නට පෙරම
තුරු හිසක හිස හෙවූ
පිණි බිඳුව.

උනන්නත් පෙරාතුව
වියලෙන්න නියමවූ
උණු කඳුළ !

එය රහසකි!

Claudia Lucia Mckinney-

කම්මුල් රතුවුන කරුණ 

නොදුටුවා සේ හිඳී 

දෙඅදර .

ඊටත් තට්ට තනියම!!

.

"ඔයා හිටියේ මෙතනමද?

එදා ඉඳන්...අවුරුදු බර ගානක්.

මං එනකල් බලාගෙන

නෑවිදින් ඉඳීද කියලත් හිත හිත

ඔයා මෙතනම හිටියද?"

'මං හිටියා මෙතන

හුඟක් කල්

ඉස්සි ඉස්සී මග බල බල.

නෑවිදින් ඉන්නකොට අඬ අඬ.

මැරෙන්නත් හිතුනා වෙලාවකට.

දහිරිය තිබුන් නෑ ඒකට .

ඊට පස්සේ තීරණේ කළා මම

ඇවිදින්න...ඉස්සරහට.

පස්සට නෙමෙයි.ඉස්සරහට.

එහෙම යනකොට යනකොට

හම්බවුනා එයාව.

..මොකට අඬනවද

..එන්න යන්න මාත් එක්ක.

එයා කිව්වා එහෙම.

මේ එයාගේ මුණුපුරා.

දැන් තුනේ පන්තියේ.

ඉතින් ඔයා කොහොමද?

ටිකක් වයස පාටයි.

ගැළපෙන්  නෑ ෂර්ට් එක කලිසමට.

ඇයි අනේ මේ රබර් සෙරෙප්පු?

මොකද මේ පස්සෙන් පස්සට ඇවිදින්නේ?

ඊටත්

ත

ට්

ට

ත

නි

ය

ම?

තවමත්!

තට්ට තනියම

කට්ට කාගෙන 

හඬා වැළපී 

මෙහෙම උන්නත් 

අතින් අල්ලන් ඉන්න බව ඔබ

මට නිතරෝම දැනෙනවා 

මං හැමෝටම කියනවා.

දවසක හමුවෙමු!

ඔබ ආපසු එතොත් 

මග සොයාගනු පිණිස 

තැන තැන තබා ආ 

සැමරුම් ටිකක් ඇත. 

ඝණඳුරෙන් වැසී ඇතිමුත් 

ඉතා නිශ්ශබ්ද ඉසව්වක 

මා වෙසෙන කුඩා පැල්පතෙහි 

කවුළුවක අගුළ බිඳී ඇත.

ඉංග්‍රීසි සිහින

                                 Michael__Inessa_Garmash

.

.....ඉංග්‍රීසි සිහින.....

එළිමහනේ දුඹුරු තේ බොන 

බූල් බල්ලන් පසුබිමේ දුවපණින 

කැන් කැන් සහිත සායවල් අඳින

ඉංග්‍රීසි නෝනාවරුන් ඇත චිත්‍රපටිවල.

කබා ඇඳගත් මහත්වරුන් එන 

දන නමා අත මඳක් සිප ගන්න

බැදපු තාරා මස් සමග පාන් කන 

අහෝ මටත් එවැන්නන් වෙන්ට සිතෙන.

අශ්ව කරත්තයක කිරි කිරි හඬකි

රන්වන් හිසකේ සහිත උස් සිහින් තරුණයෙකි 

කෝ මගේ උඩ කබාය හිස් වැස්ම දෙනු මැනවි 

(ඇවිත් බත් උයන්නම් එතෙක් ඉවසනු මැනවි).

ඔබ හා මා!

                                             Justyna Kopania,...    

ගඟ ගලා යා යුතුය 

සඳ ඒදැයි නොඒදැයි

මග බලා නොඉඳම .

කළු,සුදු හා දුඹුරුද

Carlos Queiroz__Brasil_

.

ඔබ ලියූ බොහෝ දෑතර 

මා ගැන ලියු යමක් වෙත්දැයි 

අග සිට මුලට බලනතර 

හමුවිය විවිධ ගැහැනුන්.

කළු,සුදු හා දුඹුරුද 

උස්,කෙට්ටු හා මිටිද 

මෙහෙකාරියන්,සිල්වන්තියන් හා වෙසඟනන්ද 

පොත් පිටු පුරා සිටියහ.

මා කොහිද?මා කොහිද?

මා එතරම්ම කුදුද?

එතරම්ම සිත් නොගන්නා සුළුද?

නොබැඳිනිද ප්‍රේමයෙන් කිසිදිනෙක.

රාගයෙන් බැඳිනිද අන් කතුන් සමග.

"සොඳුරිය 

නුඹ මා විමසුවා මිස 

මා කියවා නැත.

නුඹ මා නැරඹුවා මිස 

මා දැක නැත.

උල් සැතක් ගෙන 

සිදුරු කරනු මැන මා ලය.

හමුවෙයි එවිට 

ඔබ ගැන ලියූ දෑ සැම ."

.....සින්ඩරෙල්ලා....

.

.....සින්ඩරෙල්ලා....

පොඩිඋන් දෙන්නෙකුත් අරගෙන 

නැටුම්හල වෙත නොයයි 

දැන් ඇය .

කුමාරයාට මොන තහංචිද 

නොවැරදී නැටුමට යයි 

සෙනසුරාදට ,ඉරිදට.

.

....චිත්‍ර පාඩම.....

පෙම්වත 

අපි මුලින්ම 

ඇඟිලි දෙකක් අඳිමු.

කාලයක් ගිහින් 

හිතුනොත් 

මුදු දෙකක් අඳිමු.

.

ගිම්හාන අහස
වීසිකළ
වලාකුල් ලේන්සුව
හුන්නස්ගිරි පතනයක
පැතිර.

.

අතනින් මෙතනින් 

පින්තාරුකළ 

ගහ කොළ රූ ඇති 

කැන්වසයකි 

වැස්ස.

.

අකුරු කොච්චර කලත් 

ඉලක්කම් නේද 

අන්තිමේ වැදගත්!

.

ආ බව හඟවන 

එකක් හා 

ගිය බව හඟවන 

එකක් යනුවෙන් 

පා සලකුණු දෙකකි 

ජීවිතය.

.

කෙකටියා මල් නිතර 

ගඟ ගැනම සිතුවාට 

මුහුදකට වැටුන ගඟ 

සිතයි මුහුදක් සේම.

අත්ලක පහස!!!

.

දිගු පාද තබමින් 

නික්ම යන කල කාළය 

වියළෙනු නොහැකිවෙද 

විළක් මුහුදක් තරම් ආලය.

කුඩා කවුළුව තුලින් 

සඳත් නික්මෙන මැදියම 

අමතක කරනු හැකිවෙයි 

මෘදු අත්ලක පහසද. 

ලය මත වැතිර හුන්

කෙහෙ කැරැල්ලක සුසුවඳ

තවත් නොදැනෙනු ඇත

අඩක් මියගිය හෙයින් හදවත. 

ඉදිරියට ඇවිද යන

දහසකුත් දන මගහැර

පසුපසට ඇවිද යන්නට

ඉතින් නැත මට දහිරිය.

.

මඳින් මඳ 

ක්ෂීණවුණු 

පාද ජාලයක 

මතකය

අඟලෙන් අඟල 

කිඳා බසින 

කිනිස්සක 

මුවහත.

පුරාණ පොසිලයක්!!!

Sergey Samsonov_

මියගියේ යැයි විසිකළ 

පැරණි ප්‍රේමෙක පොසිලෙක

තිබිය හැක බිජුවට කීපයක්

සුදුසු පොළොවක පැළවෙන. 

නොදන්නා නුවරක වුව 

සිටිනු හැක එක් යුවතියක්

වෙනත් නමකින් පිපෙන මල් වුව

තමන්ගේ මෙන් සුරකින. 

රාත්‍රිය නිදිගත් කල

නිහඬවම විත් කනට කොඳුරමි

අතර මගකින් පටන් ගත්තත්

ජීවිතය ඉමිහිරි බව.

.

දිගු වලිගයක් ඇති 

අහස් මකරෙක් 

රන් තැටියට 

මඳක් පහළින් .

.

ඇස් හීනි යුවතිය 

බලාගෙන

වැස්සට සේදෙයි

ඇස් වටා ඇඳි අංජන!

.

ගිමන් නිමනා

රෑ අහස යට

අතරමංවූ

කදෝපැණි මම.

නොනැවතී

විහිදුවත් එළිවැට

වගක්වත් නැත

තාරුකාහට.

.

සඳලුතලයක 

සුළං සීණුව ගී ගයයි.

සුළං රැල්ලක් 

කටින් පිඹ සඳරැස් නිමයි.

ගෙඹි කැලක් 

අනුරාගයේ ගීතය ගයයි 

ලොවම නිදියයි 

ඔබත් නිදි වරතැයි සිතෙයි.

.

නාඬන් කියා කිව්වත් 

උළලේනි අඬනවා තවම

සිහිවෙලා කපු ව.

රන්බන්ඩේ කිව්ව ලෙස

මදටිය ඇට වැටෙනවා ඇළට

කළතමින් පපුව.

ගානක් නෑ වගේ

හිනාවීගෙන හිටියත්

හඳටත් ඇඬෙනවා එවිට.

.

හුඟක් මල් 

බිම වැටී 

පෑගෙනායුරු දැකත් 

තවත් මල් 

බොහෝ වෙති 

හිත හදාගනු සමත්.

.

හරියටම හත්දොහේ දානෙට 

එක දවසකට කලියෙන් 

කවුරුත් නැති වෙලාවක 

ඔබ ඇවිත් හිටියා තනියෙන්.

සුදු කමිසයට කළු කලිසමක් 

මගුල් ගේක යන විදියට 

කෝට් එකක්,ටයි පටියක්.

හිනා යන තරමට පවුඩර් වැඩිව.

"ඔයාට හුඟක් පාළුද?

පුතත් ඉතිං යාවි නේද?

නිවාඩු නැතුවැති 

අපේ රටේ වගේ නෙමේනේ.

මාත් ඉතින් යන්න කියලා 

හෙට හවසට බණෙන් පසුව.

ඇවිද ඇවිද ඉඳලා ඇතිවෙලා 

කවද උන්නත් යන්න එපැයි .

මං කිව්වනේ ඔයාට 

ඩ්‍රයිවින් ඉගෙන ගන්න කියලා 

කෝ ඇහුවයැ,හිනාවුණා මිස 

හැමදාම ඉඳියි කියලා හිතුවද මම.

තාමත් මං ආසයි 

ඔයාගේ නිල් පාට ගවුමට

රැළි රැළි අත් දාපු 

දණට අඟලක් ඉහළින් නැවතුනු.

බැල්කනියට ඉහළින් 

හැමදාමත් හඳ පායයි 

එක හාන්සි පුටුවක් 

දැන් ඕනි නැති ගානයි.

අපි ආයේ දවසක හමුවෙයිද 

කහ ඉර පනිනකොට පාරෙදි 

පොළේදි ,පන්සලේදි,උයනෙදි 

කවදාවත් හමුවෙන්නෙ නැතිවෙයිද?

හමුවුනත් අඳුනාගනීද 

අඳුනාගත්තත් පෙම්කරයිද 

පෙම්කරත් විවාහවෙයිද 

මේ වගෙම ආයේ වෙන්වෙයිද?"

.

පියානෝ ගහන මානවක 

අතැඟිලි රතුවීදැයි 

බලන්නට 

කෙනෙක්වෙද 

හවසට?

..
පෙම්වත
ළඟදීම අපි
අපිටම කියා කන්දක් ගමු.
ඉකිගසන සුළං හා වැළපෙන්න
විලෝ ගස් පේලියක් හිටවමු.
හැකිනම් කන්ද මුදුනේ
සෙල්ලම් පොකුණකුත් මවමු.
තාරවුන් කීප දෙනෙකුට
සතුටින් පිහිනන ලෙස අණ දෙමු.
කන්‍යා දිය ඇලිද , අකම්පිත ගල් කුළුද
ගැළපෙන ලෙසට සකස්කරමු.
කියඹු වැල් කිතිකවන
මඳනල පවා නොදැනෙන
ගල් පිළිම දෙකක් වී
එකිනෙකා දෙස බලාගෙනම
අපි සදාකල් පසුවෙමු.
පෙම්වත ,
අපි අපිටම කියා කන්දක් ගමු.

.
මෙන්න මේ වැනිම
තෙතබරිත හැන්දෑවක
පාෂාණිභූත වෙන්න පෙර
අප දෙදෙන
ඉඳහිට සිතෙයි
තවමත් උණුසුම්දැයි
ඔබේ දෙකොපුළ
පෙර මෙන්ම .

.
උස් තුරක්
ලොම් ගස්සා
අතහරී
හිම මල්
මීදුමට.

.
තවමත්
සම සුදුමැලිව ඇත
වෙදැඟිල්ලෙහි
මුදුවක ලකුණට.

.
සින්ඩරෙල්ලා ,
නොදන්නවා වගේ උන්නට
අප තවම
අළු දැරියන්ය
පාන්දර හතරේ  කණිසම
වැදෙන විට.

.
හයයි විස්සේ
රේල්ලුව ගිය පසුව
යළිත් මල් නොපිපුණි
සිල්පර කොටන් උඩ .

.
ඉර බැස යයි .
කවුළුවට පිටුපා
දෙවන මහලේ කෙල්ල
හිසකේ තඹපාට ගැන්වුන .

.
ඇඟිලි
වැඩෙයි
මුදු
එහෙමමයි.

.
කොතරම් සන්තෝෂද
මට
මගේමයි කියා
දුකක් ඇති එක.

.
තනිවුනු හිම මිනිසෙකුගේ
මෆ්ලරය වැනෙයි සුළඟට
සිහින් වැස්සක් මෙන්
හිම පියළි විසිරෙයි අවට.

.
කියන් ...!
ඔබේ දෙතොලට
හිරිහැරද
මගේ ගෙල බැඳි
රන්දම.

.
උස ගිහින් ඉවරවුන
නිහඬ කඳු පවා සුසුම්ලයි
හුදකලා වලාකුළක්
ගෑවී නොගෑවී යන විට.

.
නොබලාම යා යුතුය
වෙරළෙහි අඩි ළකුණු දෙස
සද්දන්ත රළක් විත්
මතක සෝදාලන තුරුම.

.
තෙත ගවුම
ඇඟට ඇලුනට
හුළඟ දොස් කියයි
වැස්සට.

.
රෝස කම්මුලක්
ඉහළ පහළ යේ
මවිල් පපුවක්
ඉහළ පහළ යන
හැමවිට.

.
රෑ කෑමෙන් පසුව
සීනි වැඩි කෝපි බඳුන
අල්ලසක් බව හැඟුනද
නොපෙන්වා ඉනු මැනව
හිමියනි
අමනාප දෙදිනකට පසුව. .

.
කෙලෙස දල්වමිද
ගිණිමැල
පිදුරුත් දරත්
වැස්සේ තෙමුණු කල.

.
පෙණ ගොබයක් සැළුණු හඬක් මිස
දෂ්ඨ කල තැනක් නැත.
සොඳුර
කිළිටි විය එහෙත්
මලසුන.

.
දහයෙ පංතියෙ
සුදු බැලරිනා සපත්තුවක්
තදින් පොළොව සාරයි
එකොළහේ පංතියෙ
සුදු දිග කලිසමක් ළඟ.
"පස්සෙ කියන්නම්" කියයි
ඇහෙන නෑහෙන ගානට.

.
අතුරුදන්වූ පෙම්වත
කවුරුන් හෝ පැමිණ ඇත
ඔබේ උස මහතම ගෙන
සිනාසිය යුතු ,සිඹිය යුතු ජවනිකාවල
රවන ,ගොරවන,දත් කූරු කන.

.
කුඩා රිදී තෝඩුව
නිතර එහෙ මෙහෙ
සෙළවෙයි
ගෙළ සිඹින හැමවර .

.
හිමියනි
කාලයේ ඇවෑමෙන්
එක තැන පල්වී
දිය සිඳි ජලාශය මම.

තෝරා ගත මැනව
උණුසුම් ගිනි කන්ද දිදුලන.
මහත් අභිරුචියෙන්
දැවෙනු හැක රිසි ලෙස.

ඉනික්බිති
මඳ කලක් පැවතෙමි
සිහිල් දිය ඉල්ලා
ඔබ හඬත්දැයි
ඇහුම්කන් දෙනු පිණිස.

..
මුව දොවා
ඉවර නැත
කුඩා උඳුපියලිය
මොහොතක් පමාවෙන්
ඉර.

.
ප්‍රියය ,
මේ සැන්දෑ හෝරාවය
නිතර දැක නුපුරුදු
අමුතු සෙවනැළි මැවෙන
දැනහුන් එකිනෙකා
හඳුනා ගත නොහැකිවන
නාඳුණන අමුත්තන්
හඳුනන සේ හැඟෙන
නිමේෂයකින් පවා
අතරමං විය හැකිවන
ප්‍රියය ,
මේ සැන්දෑ හෝරාවය
අප දෙදෙන ප්‍රවේසම් විය යුතු.
පහන් දැල්වෙන තුරු
එකිනෙකා වැළඳගෙන සිටිය යුතු.

.
මේ සුළඟ
හමන හැටි සර සර ගගා නිතරම
කෙහෙල් අතු ඉර ඉර
හාදු දී මල් ගස් වලට
කොතනින් අවුත්
කොතැනට යනවාද නොදැන
වැස්ස මෙන්ම
ආනන්දයෙන් පුරවා
මගේ සිත රහස් සිනාවක් රැගෙන
මුව මත තබන!

.

 රහසක් කියා ඇත ගඟ
අසල උන පඳුරකට
මියුරු හඬ මවන
බට නලාවක් වේයැයි නොදැන!

..
එක් අකල් වැසි දිනෙක
ආකාසයෙන් වැටුන හීනයකි
ඔබ
දුවිළි ටිකක් අවුස්සා
නිහඬ වුන.

.
ඉරිදා පාන්දර
සඳත් නිදියයි
වැඩිපුර.
හිරු ඇවිත් කූද්දා
හාදුවක් දෙයි
කොපුළට!

.
මුතු බෙල්ලෙකුට ඵල නැත
අහස කොඳුරන හඬ
දිය වැලක සිළි සිළියද
කවුරුන් කාට හාදු දුන්නේද යන වග .
කටු ඇනෙන ළය තුළ
සොඳුරු රහසක්
සදා සුරකිනවා මිස.

.

කමිසයේ තැවරුණු කඳුළු
වේලෙයි
පැය දෙක තුනක් ගියපසු.

.
සුදු රිබන් පටියක
දියමන්ති අල්ලා
නික්ම යයි
සැන්දෑව.

.
පෙණ බුබුළු නගා
බොරු ආඩම්බරකම්
නොපෙන්වයි
ලාබ බීර මෙන්
වයින් !

.
තරු පිපේ තවමත්
නියමිත තැන්වල
නියමිත පරිදිම .
සෙමෙන් මියයන හෙයින්
දීප්තිය මඳක් අඩුව.
එන්න! අපි තරු කියවමු
නියමිත තැනක හිඳ
නියමිත වෙලාවක.

.
අත්හළේ
එකම එක වරක් පමණය .
අහිමි වූයේ
සදාටමය!